அருள்மிகு நாமபுரீஸ்வரர் திருக்கோவில், ஆலங்குடி

அருள்மிகு அறம்வளர்த்த நாயகி சமேத நாமபுரீஸ்வரர் திருக்கோவில், ஆலங்குடி

தென்னாடுடைய சிவனே போற்றி
எந்நாட்டவர்க்கும் இறைவா போற்றி

தமிழகத்தின் புதுக்கோட்டை மாவட்டத்தில் அமைந்துள்ள அருள்மிகு தர்மஸம்வர்த்தினி சமேத நாமபுரீஸ்வரர் திருக்கோவில், மிகவும் தனித்துவம் வாய்ந்த ஒரு சிவஸ்தலமாகும். திருவாரூர் மாவட்டத்தில் உள்ள புகழ்பெற்ற குரு ஸ்தலமான ஆலங்குடி போலவே, இத்தலமும் “இரண்டாம் குரு ஸ்தலம்” என்று போற்றப்படுகிறது. நந்தியின் நெற்றியில் நாமம் குடி கொண்டுள்ளதால் இத்தல இறைவன் நாமபுரீஸ்வரர் என்று அழைக்கப்படுகிறார்.

ஆலங்குடி நாமபுரீஸ்வரர் கோவில் வரலாறு

இத்தலம் மிகவும் பழமையானது. திருவாதவூரிலிருந்து ஆவுடையார்கோவிலுக்கு மாணிக்கவாசகர் சென்றபோது, வழியில் இத்தல இறைவனையும் இறைவியையும் தரிசனம் செய்து வணங்கிச் சென்றுள்ளார். அதன் அடையாளமாக இங்கு தட்சிணாமூர்த்தி சன்னதி அமைக்கப்பட்டுள்ளதாகக் கூறப்படுகிறது. மேலும், இங்குள்ள நந்தி பகவான் மகாவிஷ்ணுவின் அம்சமாக (மால்விடை) கருதப்படுகிறார். விஷ்ணு நந்தி உருவில் சிவனை வழிபட்டதால், நந்தியின் நெற்றியில் நாமம் இன்றும் காணப்படுகிறது.

நாமபுரீஸ்வரர் கோவில் அமைப்பு

கிழக்கு நோக்கிய இக்கோவிலில் மூலவர் நாமபுரீஸ்வரர் லிங்க வடிவில் அருள்பாலிக்கிறார். அன்னை அறம்வளர்த்த நாயகி தனிச் சன்னதியில் வீற்றிருக்கிறார். இங்குள்ள மேதா தட்சிணாமூர்த்தி மிகவும் விசேஷமானவர். பொதுவாக தட்சிணாமூர்த்திக்கு கீழ் நான்கு ரிஷிகள் இருப்பார்கள், ஆனால் இங்கு இரண்டு ரிஷிகளுடன், ரிஷப வாகனத்தின் மீது அமர்ந்து காட்சியளிக்கிறார்.

இங்குள்ள நவக்கிரக அமைப்பும் மாறுபட்டது. பொதுவாக சூரியன், சந்திரன் இருவரும் இருப்பார்கள். ஆனால் இங்கு சூரியன் மட்டுமே உள்ளார். சூரியனின் வலதுபுறம் கால பைரவரும், இடதுபுறம் அவரது மகனான சனீஸ்வரர் குழந்தை வடிவில் “பாலசனீஸ்வரராகவும்” காட்சியளிக்கின்றனர்.

இத்தலத்தின் சிறப்புகள்

சூரிய பூஜை: ஆண்டுதோறும் மார்கழி 25 முதல் தை 10-ம் தேதி வரை, காலை 6:30 முதல் 6:45 மணிக்குள் சூரிய ஒளிக்கதிர்கள் நேரடியாக மூலவர் மீது விழுந்து சூரிய பூஜையை நிகழ்த்துகிறது.

புதன் பிரதோஷம்: சனி பிரதோஷத்தை விட இங்கு புதன் பிரதோஷம் மிக விசேஷமாக கருதப்படுகிறது. புதன் கல்விக்கு அதிபதி என்பதால், அன்று வழிபடுவது மாணவர்களின் கல்விக்கு சிறந்தது.

இரண்டாம் குரு தலம்: குரு பகவானுக்கு உகந்த கொண்டைக்கடலை இங்கிருந்து தான் தமிழகம் முழுவதும் விநியோகிக்கப்படுகிறது என்பது இத்தலத்தின் கூடுதல் சிறப்பு.

குழந்தை தத்து கொடுக்கும் வினோத வழிபாடு

ஜாதக ரீதியாகவோ அல்லது தோஷங்கள் காரணமாகவோ குழந்தைகளுக்கு ஆயுள் பயம் அல்லது ஆரோக்கிய குறைபாடு இருந்தால், அவர்களை இறைவனுக்கு “தத்து” கொடுக்கும் பழக்கம் இங்குள்ளது. பெற்றோர் தங்கள் குழந்தையை குருக்களிடம் ஒப்படைக்க, அவர் மூலவர் பாதத்தில் வைத்து பின் குழந்தையின் உறவினர்களிடம் (தாய் மாமா அல்லது தாத்தா) ஒப்படைப்பார். குழந்தையின் திருமணத்தின் போது, பெற்றோர் மீண்டும் வந்து தென்னங்கன்றுகளை காணிக்கையாகச் செலுத்தி குழந்தையைத் திரும்பப் பெற்றுக் கொள்வதாக ஐதீகம்.

நாமபுரீஸ்வரர் கோவில் திருவிழாக்கள்

மகா சிவராத்திரி, புதன் மற்றும் சனி பிரதோஷங்கள், குரு பெயர்ச்சி மற்றும் சனி பெயர்ச்சி விழாக்கள்.

நாமபுரீஸ்வரர் கோவில் திறக்கும் நேரம்

அருள்மிகு நாமபுரீஸ்வரர் திருக்கோவில் காலை 07:00 மணி முதல் 11:30 மணி வரை, மாலை 04:00 மணி முதல் இரவு 08:00 மணி வரை பக்தர்களின் வழிபாட்டிற்காகத் திறந்திருக்கும்.

நாமபுரீஸ்வரர் கோவிலுக்கு எப்படிச் செல்வது?

புதுக்கோட்டையிலிருந்து சுமார் 20 கி.மீ. தொலைவில் ஆலங்குடி அமைந்துள்ளது. புதுக்கோட்டை – ராமேஸ்வரம் சாலையில் சென்று வடகாடுமுக்கம் பேருந்து நிறுத்தத்தில் இறங்கினால், மிக அருகிலேயே கோவில் அமைந்துள்ளது.

ஆலங்குடி கோவில் முகவரி

அருள்மிகு நாமபுரீஸ்வரர் திருக்கோவில், ஆலங்குடி, புதுக்கோட்டை மாவட்டம் – 622301.

தொடர்பு எண்: +91 99767 92377

இதைப் பதிவேற்றியவர்..